Türkmenistanyň Prezidenti Serdar Berdimuhamedowyň adyna Täze ýyl gutlaglary
Döwlet we jemgyýetçilik işgärleri, ministrlikleriň, pudaklaýyn dolandyryş edaralarynyň ýolbaşçylary, ýurdumyzyň raýatlary hormatly Prezidentimiz Serdar Berdimuhamedowy «Pähim-paýhas ummany Magtymguly Pyragy» ýyly şygary bilen geçjek täze — 2024-nji ýyl bilen gutlaýarlar. Gutlag hatlarynda Berkarar döwletiň täze eýýamynyň Galkynyşy döwründe döwlet Baştutanymyzyň ýolbaşçylygynda ata Watanymyzyň gazanýan üstünlikleriniň barha artýandygy, milli ykdysadyýetimiziň ähli ulgamlarynda giň möçberli maksatnamalaryň üstünlikli durmuşa geçirilýändigi, hormatly Prezidentimiz Serdar Berdimuhamedowyň oňyn Bitaraplyk, parahatçylyk söýüjilik, hoşniýetli goňşuçylyk we netijeli hyzmatdaşlyk ýörelgelerine esaslanýan daşary syýasaty netijesinde Türkmenistanyň dünýädäki abraýynyň has-da belende galýandygy bellenilýär. Hatlary iberenler hormatly Prezidentimizi Täze ýyl baýramy bilen tüýs ýürekden gutlap, berk jan saglyk, uzak ömür, bagtyýarlyk, Garaşsyz, Bitarap Watanymyzy mundan beýläk-de ösdürmäge we kuwwatly döwlete öwürmäge gönükdirilen köpugurly işinde egsilmez güýç-kuwwat arzuw edýärler. Döwlet Baştutanymyzy Täze ýyl bilen Mejlisiň Başlygy D.Gulmanowa gutlady.