Garaşsyz, hemişelik Bitarap Diýarymyzda her ýylyň 7-nji aprelinde Bütindünýä saglyk güni giňden bellenilýär. Bu gün milli senenamamyzda dostlugyň, parahatçylygyň, sportuň, sagdynlygyň hem-de ruhubelentligiň belent ýörelgelerini dabaralandyrýan, jemgyýetimiziň agzybirligini, jebisligini alamatlandyrýan şanly sene hökmünde aýratyn orun tutýar.

Ýurdumyzda «Saglyk» Döwlet maksatnamasyndan ugur alnyp, ilatyň saglygyny goramak, sagdyn durmuş ýörelgelerini berkarar etmek, köpçülikleýin bedenterbiýäni, sporty ösdürmek boýunça giň gerimli hem-de aýdyň maksatly işler üstünlikli durmuşa geçirilýär.