Dag etegine aýratyn bezeg beren, sebitde deňsiz-taýsyz «akylly» şäheriň lukmançylyk ylymlarynyň doktory, alym Arkadagymyzyň paýhasyndan dörändigini bellemek ýakymly. Täze şäherde ynsan saglygyny goramak, ekologiýa arassaçylygy babatda ähli mümkinçilikler we amatlyklar göz öňünde tutulypdyr. Arassa dag howasy, miweli, saýaly we pürli baglar, dürli güller keýpiçaglyk döredip, ruhuňy göterýär. Daşarky gurşaw üçin zyýansyz elektromobilleriň we elektrobuslaryň hereket etmegi, «akylly öý» hyzmatlaryndan peýdalanylmagy bu şäheriň ekologik taýdan arassadygyny ýene bir ýola subut edýär. Ýurdumyzyň saglyk ulgamynda dünýä nusgalyk işleri bitiren türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Arkadag Serdarly bagtyýar ýaşlar ýylynyň 12-nji awgustynda Arkadag şäheriniň saglygy goraýyş edaralarynyň işi bilen tanyşlygynda Arkadag şäheriniň köpugurly hassahanasyna bardy.