Üsgülewük — köplenç, sowuklamanyň netijesinde ýüze çykýar we başga-da käbir keselleriň alamaty hökmünde duş gelýär. Sowuklamada, pnewmoniýada, bronhial demgysmada, bokurdaga del jisimiň düşmegi netijesinde, ýakymsyz ysly ýa-da zäherli maddalar ysgalanda, ýürek ýetmezçiligi sebäpli kiçi ganaýlanyş ulgamynda durgunlylyk dörände gury, nemli gakylykly, tutgaý görnüşli ýa-da wagtal-wagtal peýda bolýan üsgülewük ýüze çykýar.

Çagalarda sowuklama we üsgülewük ululara garanyňda has ýygy duş gelýär. Sowuklamany, köplenç, wiruslar we bakteriýalar döredýär. Olar dem alyş ýollarynyň dürli böleklerinde: burunda, bogazda, kekirdekde, traheýada, bronhlarda we öýkende keseliň döremegine sebäp bolýar.