Gahryman Arkadagymyzyň we Arkadagly Gahryman Serdarymyzyň taýsyz tagallalary bilen ýurdumyzda orta we kiçi telekeçiligi ösdürmeklige uly üns berilýär. Biz hem özümiziň telekeçilik işimizi, ýagny ene-mamalarymyzdan dowam edip gelýän el işlerimizi ýaşlara ýetirmekde döredilýän şert-mümkinçiliklerden ýerlikli peýdalanýarys. Halyçylygy, keşdeçiligi we tikinçiligi ýaş gyzlara öwredýäris. Munuň üçin orta mekdeplerde bolup, mekdep okuwçylarynyň arasynda wagyz-ündew çärelerini geçirýäris. Şeýle çäreleriň birini golaýda «Hünärim bar — hormatym bar» ady bilen Balkanabat şäherindäki 22-nji orta mekdepde ýokary synp okuwçy gyzlaryň arasynda geçirdik.
Türkmenistanyň Senagatçylar we telekeçiler birleşmesiniň welaýat bölüminiň Türkmenistanyň Zenanlar birleşiginiň welaýat bölüminiň ýanyndaky Keşdeçilik sungatynyň guramagynda geçirilen wagyz-ündew çäresinde edilen çykyşlarda Gahryman Arkadagymyzyň käbesi Ogulabat ejäniň ajaýyp el hünäri bolan alaja sungaty, tikinçiligiň, biçimçiligiň, keşdeçiligiň ýaşlara öwredilişi, ýaş gyzlaryň hem ene-mamalarymyzdan gelýän el hünäriniň inçe tilsimlerini ele almakda ýerine ýetirýän işleri barada giňişleýin gürrüň edildi. Gadymy nusgalara täze öwüşgin çaýmak, köýnekleriň ýeň-ýakalaryny keşdelemek, olary her bir gyzyň özüniň biçip hem tikip geýmelidigi, munuň gyz maşgala üçin zerurlyk hasaplanylýandygy hakynda durmuş mysallaryna salgylanyp, gyzlara öwüt-ündew edildi. Gadymdan gelýän ýol-ýörelgelerimizi, däp-dessurlarymyzy mynasyp dowam etdirmäge, telekeçiligi ösdürmäge ak ýollary açan Gahryman Arkadagymyza we Arkadagly Gahryman Serdarymyza tüýs ýürekden alkyş aýdyldy.
