HABARLAR

Türkmenistan nebit-gaz pudagynda daşary ýurt kompaniýalary bilen ylmy hyzmatdaşlygy güýçlendirýär

2-nji fewralda Türkmenistanyň Ministrler Kabinetiniň mejlisinde Ministrler Kabinetiniň Başlygynyň orunbasary B.Amanow nebit-gaz pudagynyň ylmy-barlag institutlarynyň işleri, hususan-da, ylmyň öňdebaryjy gazananlaryny önümçilige giňden ornaşdyrmak boýunça görülýän çäreler, bu ulgamda amala aşyrylýan halkara hyzmatdaşlyk barada hasabat berdi. Wise-premýeriň hasabatynda bellenilişi ýaly, «Türkmengaz» döwlet konserniniň Ylmy-barlag tebigy gaz instituty we «Türkmennebit» döwlet konserniniň «Nebitgazylmytaslama» instituty bilen bilelikde hereket edýän nebit-gaz ýataklaryny netijeli ulanmaga gönükdirilen işler yzygiderli amala aşyrylýar.

4 Fewral 2024

Hyzmatdaşlyk

Türkmen-gyrgyz hyzmatdaşlygy

Türkmenistanyň Ministrler Kabinetiniň Başlygynyň orunbasary, daşary işler ministri R.Meredowyň Gyrgyz Respublikasynyň daşary işler ministri Žeenbek Kulubaýew bilen telefon arkaly söhbetdeşligi geçirildi. 2-nji fewralda geçirilen söhbetdeşligiň dowamynda taraplar ikitaraplaýyn gatnaşyklaryň meselelerini maslahatlaşdylar we söwda-ykdysady hyzmatdaşlygyny ösdürmegiň ähmiýetini bellediler.

4 Fewral 2024

Hyzmatdaşlyk

Türkmenistan daşary ýurtly hyzmatdaşlar bilen söwda-ykdysady gatnaşyklary giňeldýär

2-nji fewralda Türkmenistanyň Ministrler Kabinetiniň mejlisinde Ministrler Kabinetiniň Başlygynyň orunbasary B.Atdaýew gözegçilik edýän ulgamlarynda alnyp barylýan işleriň ýagdaýy barada hasabat berdi. Bellenilişi ýaly, ýurdumyzda söwda we telekeçilik ulgamyny hemmetaraplaýyn ösdürmek, hususy pudagyň milli ykdysadyýetimizde eýeleýän ornuny artdyrmak «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynyň» strategik ugurlarynyň biridir. Şunuň bilen baglylykda, dünýä döwletleri bilen söwda-ykdysady gatnaşyklary giňeltmek, daşary ýurtlardan getirilýän harytlaryň ornuny tutýan önümleriň öndürilişini artdyrmak, ýurdumyzyň azyk howpsuzlygyny pugtalandyrmak, söwda hyzmatlaryny kämilleşdirmek, halkyň sarp edýän harytlaryna bolan isleglerini kanagatlandyrmak boýunça zerur işler alnyp barylýar.

4 Fewral 2024

Hyzmatdaşlyk

Ykdysadyýet: Hindistanyň ümzügi öňe

Hindistanyň jemi içerki önümi 2027-nji ýyla çenli nominal hasabynda 5 trillion dollar bolar. Bu görkezijä görä, ýurt Ýaponiýadan we Germaniýadan ozduryp, dünýäde üçünji orny eýelär diýip, Hindistanyň Maliýe ministrligi çaklaýar. Häzirki wagtda Hindistan 3,7 trillion dollara ýetýän jemi içerki önümi bilen dünýäde bäşinji orunda durýar. Ýurt ABŞ-dan, Hytaýdan, Ýaponiýadan we Germaniýadan soň bäşinji ýerdedir.

4 Fewral 2024

Hyzmatdaşlyk

Kataryň Söwda-senagat edarasynda geçirilen duşuşyk

2024-nji ýylyň 31-nji ýanwarynda Türkmenistanyň Katar Döwletindäki Adatdan daşary we Doly ygtyýarly ilçisi M.Seýitmämmedowyň Katar Döwletiniň Söwda-senagat edarasynyň başlygynyň birinji orunbasary Mohammed bin Ahmed Tawar Al Kuwary bilen duşuşygy boldy. Duşuşygyň dowamynda iki döwletiň söwda-ykdysady gatnaşyklarynyň ösüşi ara alnyp maslahatlaşyldy. Hususan-da, taraplar iki ýurduň arasyndaky gowy gatnaşyklaryň we giň mümkinçilikleriň bardygyny hem-de Türkmenistan bilen Kataryň dünýä energiýa bazarynda möhüm orun eýeleýändigini nygtap, iki ýurduň arasynda söwda gatnaşyklarynyň has ösdürilmeginiň zerurdygyny bellediler. Şunuň bilen baglylykda, Türkmen-Katar Işewürler forumynyň nobatdaky mejlisini geçirmek bilen bagly meseläniň üstünde durlup geçildi.

4 Fewral 2024

Hyzmatdaşlyk

2023-nji ýylda halkara howa gatnawlary 36,9 göterim artdy

Geçen ýylda tutuş dünýäde awiakompaniýalar tarapyndan amala aşyrylan ýolagçy gatnawy 36,9 göterim artdy. Emma muňa garamazdan, bu görkeziji pandemiýadan ozalky derejä ýetip bilmedi. Has takygy, 2023-nji ýylda awiakompaniýalar tarapyndan amala aşyrylan ýolagçy gatnawy 2019-njy ýyldaky görkezijiniň 94,1 göterimine deň boldy. 2023-nji ýylda halkara gatnawlarynda ýolagçylaryň sany Ýewropada 22 göterim, Demirgazyk Amerikada 28,3 göterim hem-de Aziýa — Ýuwaş ummany sebitinde 126 göterim ýokarlanypdyr.

4 Fewral 2024

Hyzmatdaşlyk

Russiýa Türkmenbaşy Halkara deňiz portunyň üstünden Owganystana we Eýrana däne eksport etmäge gyzyklanma bildirýär

Russiýa Federasiýasynyň «Rossiýskiýe železnyýe dorogi» (RŽD) açyk paýdarlar jemgyýetiniň wekilleri Türkmenbaşy Halkara deňiz portunyň mümkinçilikleri we kuwwatlylygy bilen tanyşmak maksady bilen iş saparyny amala aşyrdylar. Myhmanlar deňiz portunyň Umumy ýükler, Ürgün ýükler, Konteýner we Ýolagçy-parom terminallaryň mümkinçilikleri, ýerine ýetirýän hyzmatlary, tehnikalary bilen ýakyndan tanyşdylar. Bu barada «Türkmendeňizderýaýollary» agentliginiň resmi saýtynda habar berildi. 31-nji ýanwarda bolan saparyň dowamynda Russiýa Federasiýasynyň RŽD paýdarlar jemgyýetiniň wekilleri bilen Türkmenbaşy Halkara deňiz portunyň, «Demirýollary» AGPJ-niň we «Türkmenistanyň ulag-logistika merkezi» PJ-niň wekilleriniň arasynda iş duşuşygy geçirildi. Habarda bellenilişi ýaly, duşuşygyň dowamynda Türkmenistanyň ulag pudagyndaky üstaşyr mümkinçilikleri, daşary ýurt müşderiler üçin döredilýän ýeňillikler barada bellenip geçildi.

3 Fewral 2024

Hyzmatdaşlyk

Türkmenistan bilen Türkiýäniň baş diplomatlary raýat awiasiýasy, energiýa hyzmatdaşlygyny maslahatlaşdylar

Türkmenistanyň daşary işler ministri Raşid Meredow penşenbe güni Türkiýäniň daşary işler ministri Hakan Fidan bilen telefon arkaly söhbetdeşlik geçirdi. Söhbetdeşligiň barşynda raýat awiasiýasy we energiýa hyzmatdaşlygy ara alnyp maslahatlaşyldy. Bu barada Türkiýäniň “Anadoly” agentligi habar berýär. Telefon arkaly söhbetdeşligiň dowamynda taraplar iň ýokary döwlet derejesinde gazanylan ikitaraplaýyn ylalaşyklaryň ýerine ýetirilişi boýunça pikir alyşdylar.

3 Fewral 2024

Hyzmatdaşlyk

«DB Engineering & Construction» Hazaryň üsti bilen uzaýan halkara ulag ugry boýunça ýükleriň daşalmagyny kämilleşdirmäge ýardam eder

«Hazaryň üsti bilen halkara ulag ugry» assosiasiýasy demir ýol ulgamy boýunça netijeli işleri alyp barýan «DB Engineering & Construction» nemes tarapy bilen hyzmatdaşlyk etmek hakyndaky Ähtnama gol çekdi. «Ähtnama «Ýewropa Bileleşigi bilen Merkezi Aziýanyň arasyndaky ulag baglanyşyklary» Global Gateway maýa goýum forumynyň çäginde Brýusselde gol çekildi. Resminama Ýewropa giňişliginde ulag ulgamlary boýunça hereketi kämilleşdirmek arkaly söwda-ykdysady gatnaşyklaryň mundan beýläk-de ösmegine itergi bermek üçin niýetlenendir» — diýip, assosiasiýanyň maglumatynda aýdylýar.  

3 Fewral 2024

Hyzmatdaşlyk

Dostlukly halkyň baýramçylyk şatlygyna goşulyp

Düýn hytaýlylaryň Täze ýyly — Bahar baýramy mynasybetli Hytaý Halk Respublikasynyň Sian şäherinde dabaraly baýramçylyk çäresi geçirildi. Oňa HHR-iň Merkezi Aziýa döwletlerindäki ilçihanalary hem göni wideoaragatnaşyk arkaly goşuldylar. Bu çärä onlaýn görnüşde birikmek arkaly paýtagtymyzdaky «Ýyldyz» myhmanhanasynda hem duşuşyk guralyp, oňa HHR-iň Türkmenistandaky Adatdan daşary we Doly ygtyýarly ilçisi, şeýle hem ýurdumyzyň ýokary okuw mekdeplerinden mugallymlardyr talyplar, köpçülikleýin habar beriş serişdeleriniň wekilleri gatnaşdylar. Baýramçylyk çäresiniň barşynda HHR bilen Merkezi Aziýa ýurtlarynyň arasyndaky dostlukly gatnaşyklary pugtalandyrmak barada pikir alşyldy. Çykyşlarda Hytaýyň medeniýeti, daşary ýurtlar bilen alyp barýan hyzmatdaşlygy barada giňişleýin gürrüň berildi. Gazak, gyrgyz, täjik, özbek we türkmen ýaşlary bilermenlere onlaýn usulda sowallar bilen ýüzlendiler. Hytaý halkynyň Bahar baýramyny garşylaýşy hakynda görkezilen wideoşekiller dabara gatnaşyjylarda uly gyzyklanma döretdi.

3 Fewral 2024

Hyzmatdaşlyk