Hormatly Prezidentimiziň baştutanlygynda daşary ykdysady gatnaşyklaryň ösdürilmegine, daşary ýurt maýa goýumlarynyň çekilmegine, birža hyzmatlarynyň görnüşleriniň artdyrylmagyna, hiliniň ýokarlandyrylmagyna, bank ulgamyna döwrebap tehnologiýalaryň ornaşdyrylmagyna gönükdirilen özgertmeler amala aşyrylýar. Manadyň durnukly ykdysady ösüşe täsiriniň ýokarlanmagynda karz gatnaşyklarynyň talaba laýyk ýola goýulmagyna we onuň yzygiderli kämilleşdirilmegine aýratyn orun degişlidir. Çünki puluň esasy bölegi nagt däl karz görnüşinde hereket etmek bilen, önümçiligiň netijeliligine we ilatyň ýaşaýyş-durmuş şertleriniň ýokarlanmagyna gönüden-göni täsir edýär. Soňky ýyllarda ýurdumyzyň ykdysadyýetine goýulýan karz pullaryň möçberi yzygiderli artýar, möhleti uzaldylýar. Bu öz nobatynda ykdysadyýetiň pudaklarynyň kadaly ösüşini üpjün etmek bilen, sebitleriň sazlaşykly ösüşine oňaýly täsir edýär. Karz gatnaşyklarynda esasy ýörelgeleriň berjaý edilmegi we karz pullaryň maksadalaýyk, ýokary netijeli ulanylmagy manadyň hümmetiniň bellenilen derejede saklanylmagyna ýardam edýär.
Karz derejesini kesgitleýän abraýly agentlikler bilen hyzmatdaşlygy pugtalandyrmak daşary ýurtlardan çekilýän maýa goýumlaryň möçberiniň artdyrylmagyna, karz beriş şertleriniň ýönekeýleşdirilmegine hem-de Türkmenistanyň daşary ykdysady işiniň has-da ösdürilmegine ýardam berýär. «Fitch Ratings» halkara agentligi tarapyndan geçirilen seljerme işleriniň netijesinde şu ýylyň awgustyndan Türkmenistanyň karz reýtingi ýokarlandy. Karz derejesini, seljeriş synlaryny we barlaglary geçirmäge ýöriteleşen halkara kompaniýa bolan «Fitch Ratings» anyk maliýe gurallaryna ýa-da bazarlaryna maýa goýmak bilen bagly maliýe durnuklylygyna we töwekgelçiliklerine baha berýär. Bu, öz gezeginde, maýadarlara esaslandyrylan çözgütleri kabul etmäge we maliýe bazarynyň ýagdaýlaryny seljermäge şert döredýär.
