Düýn Türkmenabat şäherinde Türkmenistanyň we Özbegistan Respublikasynyň ikinji sebitara forumy hem-de Özbegistanda öndürilýän harytlaryň milli sergisi öz işine başlady. Bu möhüm ähmiýetli çäräniň ilkinji güni dostluk-doganlyk gatnaşyklary juda gadymdan gaýdýan iki ýurduň arasynda giň ugurly hyzmatdaşlygyň altyn halkasynyň emele gelendigini aýdyň görkezdi.
Şäheriň iň bir gözel ýerleriniň birinde ýerleşen «Türkmeniň ak öýi» binasynda we onuň daş-töwereginde baýramçylyk öwüşginlerine beslenen wakalaryň ençemesi geçip dur. Şolaryň birisinde bolsa goňşy ýurtlaryň ykdysady hyzmatdaşlygyny ýene-de berkitmäge goldaw berýän dürli kärhanalaryň, işewürleriň önümleri goýlupdyr. Iki ýurduň wekilleri öz önümlerini biri-birine höwes bilen görkezýärler. Bu owadan görnüşleri synlap durşuňa hormatly Prezidentimiziň goňşy ýurtlar bilen ykdysady gatnaşyklaryň ösdürilmegi ugrunda edýän yzygiderli aladalarynyň ýerine düşýändigine çäksiz guwanýarsyň hem buýsanýarsyň. Bu gatnaşyklar diňe bir şu günümiziň däl, eýsem, geljekde hem ýurtlaryň durnukly ösüşlerini üpjün edýär, dost-doganlygymyzy has berkidýär. Işewürler biri-birinden öwrenýärler, tejribelerini paýlaşýarlar, şolaryň netijesinde täze çemeleşmelere esaslanýan önümçilikler giňeldilýär, içerki bazarda zerur bolan önümleriň artykmajyny daşarky bazarlarda hem ýerlemäge mümkinçilikler döreýär. Önüm öndürijileriň täze bazarlary gözlemeklerine itergi berýän amatly şertler peýda bolýar. Eksportyň ösmegine döwlet kärhanalarynyň, şeýle hem hususyýetçileriň uly topary öz goşantlaryny goşýarlar.
