«Sporta gadymy döwürlerden bäri parahatçylygyň we dostlugyň nyşany hökmünde garan ata-babalarymyzyň asylly ýoluny dowam etdirip, biz sporty dünýä ýurtlary bilen hyzmatdaşlygyň möhüm ugry, halklaryň arasynda dostlukly gatnaşyklary berkitmegiň ählumumy serişdesi hasaplaýarys» diýip nygtaýan hormatly Prezidentimiziň parasatly ýolbaşçylygynda Gahryman Arkadagymyzyň ähli ugurlarda, şol sanda sport ulgamynda badalga beren beýik işleri Berkarar döwletiň täze eýýamynyň Galkynyşy döwründe rowaçlyklara beslenýär. Sagdynlygyň, ruhubelentligiň, sportuň ýurdy hökmünde ykrar edilen Bitarap Watanymyzda sport halkymyzyň durmuşynyň aýrylmaz bölegine öwrüldi. Şol bir wagtda hem sportuň dünýä ýurtlary bilen hyzmatdaşlygyň möhüm ugry, halklaryň arasynda dostlukly gatnaşyklary berkitmegiň ählumumy serişdesi hökmündäki orny hem barha uly ähmiýete eýe bolýar.
Soňky ýyllarda türkmen sportunyň ösüşiň täze basgançaklaryna çykyp, ýurdumyzyň iri halkara sport ýaryşlarynyň geçirilýän merkezine öwrülendigi ýurdumyzyň her bir raýatyny buýsandyrýar. Dürli ýyllarda geçirilen ýaryşlarda milli ýygyndy toparymyzyň agzalarynyň Watanymyzyň sport abraýyny has-da belende götermekleri bolsa aýratyn guwandyryjydyr. Şol ýaryşlaryň ýokary derejede guralmagy netijesinde hem ýurdumyzyň halkara sport abraýy täze belentliklere göterildi. Aşgabat şäheriniň «Arkalaşygyň täze sport mümkinçilikleriniň şäheri» diýlip yglan edilmegi hem munuň aýdyň subutnamasy bolup, ol türkmen paýtagtynyň iň ýokary derejeli ýaryşlary geçirmek üçin ähli zerur şertleri özünde jemleýän, dünýä sportunyň okgunly ösýän merkezi hökmünde halkara giňişlikde uly abraýa eýedigini nobatdaky gezek görkezdi. Bilşimiz ýaly, bu taryhy çözgüt «Pähim-paýhas ummany Magtymguly Pyragy» ýylynyň 24-nji maýynda Aşgabatda geçirilen GDA-nyň Hökümet Baştutanlarynyň Geňeşiniň nobatdaky mejlisiniň çäklerinde biragyzdan kabul edildi. Üstümizdäki ýylda Aşgabatdaky Olimpiýa şäherçesiniň Tennis toplumynyň Aziýanyň Tennis federasiýasy (ATF) tarapyndan «Tennis boýunça Aziýa sebitiniň okuw-türgenleşik merkezi» diýlip ykrar edilmegi hem ýurdumyzyň we onuň gözel paýtagtynyň dünýäniň sport giňişliginde uly at-abraýdan peýdalanýandygynyň aýdyň nyşanyna öwrüldi.
