Düýn paýtagtymyzdaky «Arçabil» myhmanhanasynda Araly halas etmegiň halkara gaznasynyň Döwletara utgaşdyryjy suw hojalyk komissiýasynyň 87-nji mejlisi geçirildi. Komissiýanyň işi Merkezi Aziýa sebitinde suw hojalygy babatda ýüze çykýan meseleleri bilelikdäki tagallalar arkaly çözmäge gönükdirilendir. Mejlise sebit ýurtlarynyň suw hojalyk edaralarynyň ýolbaşçylarydyr wekilleri we hünärmenleri gatnaşdylar.
Mejlisde toparyň agzalarynyň hem-de Araly halas etmegiň halkara gaznasynyň Ýerine ýetiriji komitetiniň ýolbaşçysynyň çykyşlary diňlenildi. Mälim bolşy ýaly, Döwletara utgaşdyryjy suw hojalyk komissiýasynyň işiniň maksady esasy suw serişdelerinden döwletler üçin her ýylky suwy ulanmak boýunça çägi tassyklamakdan, şol sanda uly suw howdanlarynyň işiniň tertibini işläp düzmekden we tassyklamakdan, suw serişdeleriniň hakyky derejesinden ugur alyp, sebitiň suw serişdelerini dolandyrmakdan ybaratdyr. Aral deňziniň guramagy we suw serişdeleriniň azalmagy bilen bagly ekologik maksatnamalary işläp düzmek hem-de ýerine ýetirmek, derýalara, Aral deňzine suw bermek boýunça her ýylky möçberleri kesgitlemek hem esasy wezipeleriň hataryna girýär.
