Berkarar döwletiň täze eýýamynyň Galkynyşy döwründe «Saglyk» Döwlet maksatnamasynyň çäklerinde, Arkadagly Gahryman Serdarymyzyň taýsyz tagallasy bilen saglygy goraýyş ulgamy halkara ülňülere laýyklykda ösdi we özgerdi. Maşgala lukmançylygy Türkmenistanyň Prezidentiniň «Saglyk» Döwlet maksatnamasynyň esasy ugurlarynyň biri bolmak bilen, häzirki wagtda has kämil derejä ýetirildi. Halkara ülňülere laýyk gelýän, tehnikanyň iň soňky gazananlary bilen enjamlaşdyrylan döwrebap saglyk öýlerinde zähmet çekýän lukmanlar ýokanç we ýokanç däl keselleriň öňüni almakda, sagdyn durmuş ýörelgesini ýaşlaryň arasynda wagyz-nesihat etmekde netijeli işleri alyp barýarlar.
Drakunkulýoz, ýabany poliomiýelit keselleri, gyzamyk, gyzylja we gyzdyrma ýaly ýokanç keseller düýbünden ýok edildi. Bu keselleriň ýurdumyzda ýok edilendigi Halkara guramalar tarapyndan ykrar edildi we degişli güwänamalar bilen tassyklandy. Häzirki wagtda hem keseliň öňüni alyş sanjymlarynyň üsti doldurylyp meýilnama goşulýar. 2016-njy ýylda popiloma wirusyna, 2019-njy ýylda bolsa pnewmokokk, rotowirus ýokançlaryna we gepatitiň A görnüşine garşy öňüni alyş sanjymlary girizildi. Mundan başga-da, möwsümleýin döreýän kesellere garşy sanjymlar döwlet tarapyndan satyn alyndy hem-de Jemgyýetçilik saglygy we iýmit merkezlerinde, bellenilen saglyk öýlerinde raýatlarymyza islegine görä sanjym edildi. Bu bolsa ýurdumyzda möwsümleýin ýiti respirator ýokanjy bilen keselçiligiň azalmagyna getirdi. Biz — saglygy goraýyş işgärleri keseliň öňüni alyş sanjymlarynyň adam saglygyna oňaýly täsiri we sanjymlary bellenilen tertipde maşgala lukmanlarynyň maslahatyna görä almagyň zerurlygy barada wagyz-nesihat işlerini yzygiderli geçirýäris, bu bolsa özüniň oňyn netijelerini berýär.
