Şu ýylyň 23-24-nji oktýabrynda Russiýa Federasiýasynyň Tatarystan Respublikasynyň paýtagty Kazan şäherine bolan iş sapary wagtynda bu ýerde geçirilen «BRICS goşmak»/«autriç» formatyndaky XVI BRICS sammitinde eden çykyşynda hormatly Prezidentimiz Serdar Berdimuhamedow sebit we dünýä ösüşine täsir etjek möhüm meseleler hakda delilli gürrüň edipdi. Şeýle hem Birleşen Milletler Guramasynyň Baş sekretary Antoniu Guterriş bilen bolan duşuşygynda döwlet Baştutanymyz häzirki zaman dünýäsi hem-de umumadamzat ösüşi üçin iň möhüm meseleleriň biri hasaplanylýan ulag-logistika düzüminde ýurdumyzyň ornunyň juda ähmiýetlidigini belläp, bu ugurda alnyp barylýan işlere ünsi çekipdi.
Gadymy Ýüpek ýolunyň ýüreginde ýerleşýän Türkmenistan häzir dünýäniň geoykdysady giňişliginde ulag ulgamynyň ähli pudaklaryna iri maýa goýumlaryny gönükdirmek bilen, sebit we Ýewraziýa yklymy üçin juda möhüm bolan iri möçberli taslamalary üstünlikli amala aşyrýar.
