Türkmenistan dünýäniň we sebitiň ekologik meseleleri bilen bagly yzygiderli oňyn başlangyçlary öňe sürüp, bu ugurda işjeňlik görkezýär. Birleşen Milletler Guramasynyň Baş Assambleýasynyň 78-nji sessiýasynyň belent münberinden Arkadagly Gahryman Serdarymyzyň Merkezi Aziýadaky ekologiýa meseleler barada eden möhüm çykyşy hem dünýä ýurtlary tarapyndan uly goldawa eýe boldy. Şonda Arkadagly Gahryman Serdarymyz Türkmenistanyň «Hazar ekologik başlangyjyny» döretmek barada teklibi öňe sürdi. Bu oňyn başlangyjyň Hazar deňziniň gurşawyny hem-de biologik serişdelerini gorap saklamak, emele gelen ekologik meseleleri çözmek bilen bagly wezipeleriň giň toplumy boýunça ýokary derejede hyzmatdaşlyk etmek üçin halkara platforma bolmaga niýetlenendigini aýtdy.
Arkadagly Gahryman Serdarymyz durnukly durmuş-ykdysady ösüşiň daşky gurşawyň ekologiýa ýagdaýyny gowulandyrmak bilen baglanyşykly meseleleriň oňyn çözgütleri bilen baglydygyna uly üns berýär. Bu ýörelge «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» hem öz anyk beýanyna eýe boldy.
