Ýakyn Gündogaryň göwheri hasaplanýan Dubaý häzirki wagtda dünýäniň nazarynda. Gaýtalanmajak täsinlikleri, başy asmana direýän binalary, işewürligi ýöretmek hem dynç almak üçin döredýän ajaýyp şertleri bilen ozalam köpleri özüne çekip gelýän bu şäherde şu günler ýylyň iň iri çäreleriniň biri — BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahaty geçirilýär. «COP28-iň» işine badalga berilmeginiň öňüsyrasynda bolsa «Dubai EXPO City» merkezi Ýer ýüzüniň 165 döwletinden ýaşlaryň müňden gowragyny BMG-niň howa boýunça Ýaşlar maslahatyna (COY18) gatnaşmak üçin bir meýdança jemledi. Indi 18-nji gezek geçirilen foruma türkmenistanly wekiller hem işjeň gatnaşdylar.
Gysgaça «COY18» diýlip atlandyrylýan BMG-niň howa boýunça 18-nji Ýaşlar maslahaty «СOP28-iň» öň ýanynda howanyň üýtgemegi zerarly ýüze çykýan derwaýys meselelere jemgyýetleriň iň işjeň gatlagynyň — ýaşlaryň ünsüni çekmek, bu barada olaryň pikir-garaýyşlaryny dünýä Liderleriniň dykgatyna ýetirmek üçin meýdançany döretmek maksady bilen guraldy. Arap ýaşlar merkezi, Şarjanyň Arap uniwersiteti, Abu-Dabidäki New-Ýork uniwersitetiniň «Ýaşyl» öýi tarapyndan guralan üç günlük forum howanyň üýtgemegine garşy göreşmegi wagyz etmegiň, halkara howa maslahatlaryna we çärelerine gatnaşmaga taýýarlamak üçin ýaşlaryň mümkinçiliklerini ýokarlandyrmagyň möhüm pursady boldy. Onuň dowamynda Ýer ýüzüniň dürli künjeklerinden gelip, aýry-aýry medeniýetlere wekilçilik edýän ýaşlar howa meseleleri boýunça hökümetara syýasatlary ara alyp maslahatlaşmaga, halkara we ýerli derejedäki üýtgeşmelere ýardam etmäge mümkinçilik aldylar.
