Hormatly Prezidentimiziň başlangyjy bilen yglan edilen «Türkmenistan — parahatçylygyň we ynanyşmagyň Watany» ýyly ýurdumyzy uly ösüşlere we özgertmelere alyp barýar. Bu ýyl mukaddes Garaşsyzlygymyzyň şanly 30 ýyllyk toýunyň dabaralara beslenjekdigi, biz — saglygy goraýyş ulgamynyň işgärleriniň kalplaryny hem buýsançly duýgulara gaplaýar. Ýurt derejesinde gazanylýan üstünlikler barada söhbet edilende, mukaddes Garaşsyzlygymyzyň we hemişelik Bitaraplygymyzyň halkymyza eçilen datly miweleri, bitirilen işler, hususan-da, saglygy goraýyş ulgamyndaky möhüm wezipeleriň amal edilişi dogrusynda giňişleýin söhbet etmek has-da ýakymly. Sebäbi dürli pudaklardaky döredilen döwrebap şertleriň arasynda saglygy goraýyş ulgamynda hem gazanylan ägirt uly ösüşleriň aýdyň netijelerini halkymyzyň sagdyn durmuş ýörelgesine uýmak bilen, mähriban Arkadagymyzyň beýik başlangyçlary we üns-aladalary netijesinde abadan durmuşda ýaşaýandygyndan hem görmek bolýar.
Bilşimiz ýaly, Garaşsyzlyk ýyllary içinde hormatly Prezidentimiziň 12 jiltden ybarat «Türkmenistanyň dermanlyk ösümlikleri» atly ylmy-ensiklopedik kitaby çap edilip, bütin dünýäde uly gyzyklanma eýe boldy. Bu ajaýyp kitap, saglygy goraýyş ulgamy üçin milli hünärmenleri taýýarlaýan ýokary okuw mekdeplerinde hem talyplara ýörite öwredilýär.
