18-nji oktýabrda Türkmenistanyň Beýik Saparmyrat Türkmenbaşy adyndaky Baş akademiki drama teatrynda Türki medeniýetiniň halkara guramasyna (TÜRKSOÝ) agza ýurtlaryň II teatr festiwalynyň açylyş dabarasy boldy. Türki halklaryň sahna ussatlaryny bir ýere jemlän bu teatr festiwalynyň açylyş dabarasyna Özbegistan Respublikasynyň, Gazagystan Respublikasynyň, Gyrgyz Respublikasynyň, Türkiýe Respublikasynyň şeýle-de ýurdumyzyň teatr toparlary, köpçülikleýin habar beriş serişdeleriniň wekilleri, medeniýet we sungat işgärleri gatnaşdylar. Teatryň öňündäki meýdançada edebi-çeper çykyşlary ýaýbaňlandyryldy. Soňra festiwala gatnaşýan teatr toparlary teatryň faýesinde guralan sergini synladylar.
Dabaranyň başynda hormatly Prezidentimiziň Türki medeniýetiniň halkara guramasyna (TÜRKSOÝ) agza ýurtlaryň II teatr festiwalynyň açylyş dabarasyna gatnaşyjylara iberen Gutlagy okaldy. Türki halklaryň milli medeniýetinden, özboluşly teatr sungatyndan söz açýan çykyşlar öz gerimini giňden aldy. Ýurdumyzyň artistleridir tansçylaryň aýdym-sazly çykyşy, doganlyk halklaryň sungat ussatlarynyň Magtymguly Pyragynyň «Türkmeniň» goşgusyny bilelikde ýerine ýetirmegi tomaşaçylarda uly täsir galdyrdy. Paýtagtymyza doganlyk döwletlerden gelen teatr toparlarynyň ýerine ýetiren ajaýyp aýdymdyr sazlary, degişme sahnalary, şeýle-de ýurdumyzyň teatr artistleriniň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilen «Molla Ependiniň şorta sözlerini gürrüň berijilik däbi» esasynda taýýarlan gysgajyk degişme sahnasy, «Dostluk mekany», «Artist», «Teatr nämeden başlanýar?» ýaly çeper okaýyşlardyr jadylaýjy sirk tomaşalary dabara gatnaşanlarda uly täsir galdyrdy.
