Eýsem, biz uzyn bedenli, ýyldyrawuk, goşa ganatly bu möjejik barada nämeleri bilýäris? Ylmy çeşmeleriň şaýatlyk etmegine görä, teneçirler ýer ýüzünde mundan 300 million ýyl ozal peýda bolupdyrlar. Özleri-de ilkinji bolup asmana göterilen jandarlar hasaplanylýarlar.
Olar dik ýokarlygyna, şeýle-de öňe we yza uçup bilýärler. Teneçirleriň kellesiniň aglaba bölegini olaryň gözleri tutýar. Muňa garamazdan, olaryň garaňkylykda görüşleri pesdir. Olar maýdajyk mör-möjekleri, çybynlary uçup barýarkalar awlaýarlar. Özleri-de sagatda 30 kilometr tizlikde uçup bilýärler.
