Ülkäme toý bolup gelen ýazlarym
Bahar, ýaz! Bu sözleri eşidenimizde, kalbymyzda üýtgeşik bir ýakymly duýgular oýanýar. Baharyň waspçysy Halyl Kulyýewiň: «Aýdym aýtsam, ses ýeterden giňsiň sen, //Gursagy buýsançdan doly sähralar» diýip tarypyny ýetiren uç-gyraksyz sähralara ýaýraýan ýazyň ýakymy ýaşaýşyň ýaşlygy, ylhamyň joşguny bolup, ýürekleriň törüne ornaýar. Sähraýy halkymyzda ýüzi nurana, açykgöwünli, köpüň alkyşyna mynasyp ynsanlaryň ýaz bilen deňeşdirilmegi-de, megerem, şonuň üçin bolsa gerek. Tebigata jan berýän, göwünlerimize joşgun eçilýän baharda kalplara ýakyn mylaýymlyk, mähribanlyk bar. Biz oňa her ýyl Diýarymyza kükräp bahar gelende, hasam oňat göz ýetirýäris. Hyýalymyza serginligi bagyşlaýan, kalbymyza nepis duýgulary nagyşlaýan bahar paslynda ebedilik gözelligiň çeşmesi jemlenen. Diňe bir ynsan ogluny däl, tutuş dünýäni özüne bendi edýän ýazlarda ajaýyp ýakym bar. Görkanalykdan gözbaş alýan ýazlarda ýaşlyk, ýaraşyklylyk bar. Göwünlerimize nur eçilýän baharda tebigata seýrana çykyp, belent gerişli daglaryň tämiz howasyndan kükregiňi dolduryp dem alanyňda, durmuşyň gözelligine guwanýarsyň. Kalbymyzy joşgunly duýgulara atarýan ýazyň nurana säherleri, ýüzüňi ýakymly şemaly bilen sypap geçýän sergin gijeleri durky bilen ylhama ýugrulan sünnä esere meňzeýär. Pasyllaryň soltany baharyň tebigata eçilýän özboluşly gözelligi kalbymyzda soňlanmaz söýgini döredýär. Şol söýgi hem dünýämizi sowulmaz ýaza ö