Hormatly Prezidentimiziň parasatly baştutanlygynda amal edilýän döwlet syýasatynyň esasy ugurlarynyň birine öwrülen bilim ulgamyny köptaraplaýyn ösdürmek we halkara derejä çykarmak babatda durmuşa geçirilýän işler oňyn netijelerini berýär. Ýurdumyzda döwrüň hem ylmyň talaplaryna we zerurlyklaryna laýyklykda, täze ugurly ýokary okuw mekdepleriniň açylmagy, häzirki döwürde zerur bolan hünärleriň sanawynyň ýylsaýyn giňeldilmegi, ýokary hem ýörite orta hünär okuw mekdeplerine kabul edilýän ýaşlaryň sanynyň her ýylyň şertlerine we mümkinçiliklerine görä artdyrylmagy bilim ulgamynyň binýadynyň berkidilýändigini görkezýär.
Döwlet Baştutanymyz 12-nji iýulda şu ýylyň alty aýynda gazanylan netijeleriň jemlerine bagyşlanyp geçirilen Ministrler Kabinetiniň giňişleýin mejlisinde eden çykyşynda häzirki döwürde ministrlikleriň hem-de pudaklaýyn dolandyryş edaralarynyň ýolbaşçylarynyň, umuman alanyňda, raýatlarymyzyň her biriniň maksadynyň ýurdumyzyň ykdysady, medeni, ylym we bilim binýadyny mundan beýläk-de ösdürmekden hem-de berkitmekden ybarat bolmalydygyny nygtady.