Yşk deregi (Gülküli kyssa)
Obamyzyň ilerisinden geçýän noburdan gözbaş alyp gaýdýan ýabyň boýunda uzaklardan hellewläp görünýän iki sany köp ýaşan derek bardy. Olar biri-birine juda ýakyn bolansoň, hamala bir jübüt däl-de, bitewi bir derek ýaly görünýärdi. «Yşk deregi» diýýärdiler. Bu ady kimiň dakanyny bilýän ýok. Ýöne diýseň-diýmeseň, ol at tüýs ýerine düşüpdir. Şol goşa deregiň biriniň boýunyň beýlekisinden sähelçe beýikligi yşkyň humaryndan başlary aýlanan aşyk-magşuga çalym edýärdi.