15-nji aprelde paýtagtymyz Aşgabatda Demir ýollaryň hyzmatdaşlygy guramasyna (DÝHG) agza döwletleriň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisi öz işine başlady. Foruma DÝHG-ä agza döwletleriň 20-den gowragy, şol sanda Türkmenistanyň demir ýol we beýleki degişli edaralarynyň ýolbaşçylarydyr hünärmenleri gatnaşýarlar.
«Ýyldyz» myhmanhanasynda geçirilýän forum aýdym-sazly çäreler we halkymyzyň baý medeni mirasy bilen tanyşdyrýan sergi bilen utgaşdy. Mejlise gatnaşyjylara hormatly Prezidentimiz Serdar Berdimuhamedowyň iberen Gutlagy okaldy. Mejlisiň dowamynda geçen ýylda ýerine ýetirilen işleriň jemleri seljerilip, geljek ýyllarda meýilleşdirilýän işleriň taslamalaryna garaldy.