«Berkarar döwletiň täze eýýamynyň Galkynyşy döwründe özgertmeleriň we ösüşleriň ýoly bilen ynamly öňe barýan ata Watanymyzyň hemişelik Bitaraplyk hukuk ýagdaýy döwletleriň hem-de halklaryň arasynda özara düşünişilmegi, garaýyşlaryň ýakynlaşmagy, hyzmatdaşlyk gatnaşyklarynyň netijeli nusgalarynyň taýýarlanmagy babatda täze mümkinçiliklere uly itergi berýär» diýip hormatly Prezidentimiz nygtaýar. Ýakynda Birleşen Milletler Guramasynyň ştab-kwartirasyndan gelip gowşan hoş habar ýurdumyzyň şol mümkinçilikleri umumadamzat bähbitlerine gönükdirýändiginiň nobatdaky aýdyň güwäsi bolup dabaralandy.
BMG-niň Baş Assambleýasynyň 78-nji sessiýasynyň 63-nji plenar mejlisinde Türkmenistanyň başlangyjy esasynda «2025-nji ýyl – Halkara parahatçylyk we ynanyşmak ýyly» atly Kararnamanyň kabul edilmegi täze taryhy eýýamda eziz Watanymyzyň dünýädäki abraýynyň barha beýgelýändigini, Arkadagly Gahryman Serdarymyzyň parasatly ýolbaşçylygynda Ýer ýüzünde parahatçylygyň, ynanyşmaga esaslanýan dost-doganlyk gatnaşyklarynyň pugtalandyrylmagy üçin nusgalyk başlangyçlaryň öňe sürülýändigini we şol başlangyçlaryň halkara jemgyýetçiligi tarapyndan giň goldawa eýe bolýandygyny bütin aýdyňlygy bilen görkezdi.