Gurmak, döretmek bü günki şanly döwrümiziň şygaryna öwrülýär. Gahryman Arkadagymyz tarapyndan badalga berlen, hormatly Prezidentimiz tarapyndan üstünlikli dowam etdirýän şähergurluşyk syýasaty giň gerimli bolup, olar täze sanly tehnologiýalary özünde jemleýär. Ýurdumyzyň gurluşyk senagatynyň täzeçil usullaryny özünde jemleýän döwrebap Arkadag şäheriniň ähli görkezijiler babatda nusgalyk bolmagyna uly üns berilýär. Arkadag şäheriniň birinji tapgyrynyň üstünlikli amala aşyrylyp, bu şäheriň ýaşlaryň şäheri hökmünde ykrar edilmegi döwletli döwranymyzyň iň buýsançly wakasy hökmünde göwnümizi galkyndyrdy. Şäheriň ikinji tapgyryndaky gurluşyklara ak pata berilmegi işleriň sazlaşykly, ýokary depginli alnyp barylýandygyny tassyklaýar. Täze şäheriň gurluşyk maksatnamasynyň amala aşyrylmagyna örän jogapkärçilikli çemeleşilýär. Gahryman Arkadagymyz şäheriň gurluşygynda täzeçil tehnologiýalaryň, dünýäniň ösen tejribesiniň we sanly ulgamyň netijeli ulanylmagy, yşyklandyryş ulgamynyň, ýol-ulag düzümleriniň, ekologik derejesiniň üpjün edilmegi bilen baglanyşykly meseleleri üns merkezinde saklaýar. Bu ugurda öňde duran wezipeleriň üstünlikli ýerine ýetirilişine örän jogapkärçilikli çemeleşilýär.
23-nji martda Gahryman Arkadagymyz Arkadag şäherinde iş saparynda bolup, täze şäheriň gurluşygynyň ikinji tapgyrynda bina edilmegi meýilleşdirilýän dürli maksatly desgalaryň taslamalary, şol sanda «Saglyk» seýilgähiniň taslamasy, binalaryň bezeg serişdeleriniň görnüşleri bilen tanyşmagy, olar bilen bagly maslahatlary bermegi, degişli düzedişleri girizmegi bu işleriň yzygiderli häsiýete eýedigine şaýatlyk edýär. Gahryman Arkadagymyz gurulmagy meýilleşdirilýän «Saglyk» seýilgähinde oturdylmagy meýilleşdirilýän bedew heýkelleriniň görnüşlerini synlap, türkmen halkynyň dünýä beren milli gymmatlygy we buýsanjy bolan bedewleriň şekilleriniň täze şäheriň çäginde gurulýan desgalarda öz beýanyny tapmalydygyny belläp geçdi. Bu ýerde degişli ýolbaşçylar bilen iş maslahatyny geçirip, onuň dowamynda şäheri ösdürmegiň ikinji tapgyrynda gurulmagy meýilleşdirilýän desgalaryň gurluşyklary, Arkadag şäheriniň ilatynyň jaý bilen üpjünçiligi ýaly möhüm meselelere garaldy. «Akylly» şäher konsepsiýasyna hem toplumlaýyn çemeleşmä esaslanýan şeýle ilatly merkeziň gurulmagy, bellibir döwürde ençeme desgany öz içine alýan täze bir ýaşaýyş we işewürlik toplumlaryny, durmuş-medeni maksatly binalary özünde jemleýän iň döwrebap, täze inženerçilik we binagärlik çözgütlerine esaslanýan merkeziň ulanmaga berilmegi ýaşlar üçin hem täze döredijilik mümkinçiliklerini döredýär.
