Mejlisiň deputatlary ýurdumyzyň Bütindünýä Söwda Guramasyna goşulmagy üçin zerur bolan Türkmenistanyň daşary söwdasynyň tertibi hakynda Ähtnamany taýýarlaýarlar. Bütindünýä Söwda Guramasyna goşulmaklyga taýýarlygyň çäklerinde Türkmenistan guramanyň işgärlerinden, Aziýanyň Ösüş bankyndan, şeýle-de beýleki guramalaryň hünärmenlerinden tehniki goldawy alýar. Ýeri gelende bellesek, degişli Ähtnamany taýýarlamak boýunça 2023-nji ýylyň iýun aýynda ýörite iş topary döredilipdi.
Mälim bolşy ýaly, 2020-nji ýylyň iýulynda Türkmenistan Bütindünýä Söwda Guramasynda «synçy» derejesini aldy. Şeýle-de 2022-nji ýylyň fewralynda BSG-niň Baş Geňeşiniň nobatdaky mejlisiniň barşynda Türkmenistana Bütindünýä Söwda Guramasyna goşulýan ýurt («işjeň synçy») derejesi berildi.
