Egsilmez sahawaty bilen her bir adamyň kalbyny päkläp, ýagşy umytlara atarýan, musulman dünýäsiniň mukaddes aýy bolan Oraza aýy ýetip gelýär. Berkarar döwletiň täze eýýamynyň Galkynyşy döwründe hormatly Prezidentimiziň ýiti pähim-paýhasy, öňdengörüjilikli syýasaty netijesinde abadan ýaşaýşyň hözirini görýän il-ulsumyz bu aýy ruhubelentlikde garşy alýar. Oraza aýy ynsanlary dost-doganlyk, rehim-şepagatlylyk, hoşniýetlilik duýgularyna besläp, ruhuny tämizleýär. Mukaddes aýda bitirilen her bir nusgalyk iş täze-täze üstünliklere, beýik maksatlara ruhlandyrýar, nurly geljegimiz bolan ýaş nesillerde bolsa ynsanperwerlik, birek-birege hormat goýmak, dost-doganlyk ýaly asylly duýgulary terbiýeleýär.
Akyldar şahyrymyz Magtymguly Pyragynyň «Remezan diýerler aýyň ýagşysyn» diýip belleýşi ýaly, Oraza aýy aýratyn haýyr-sahawata, sogap işlere beslenýär, gadymyýetden gözbaş alyp gaýdýan milli däp-dessurlarymyz berjaý edilip, agyz beklenýär. Her bir öýde agzaçar sadakalary berilýär, doga-dilegler edilip, haýyr işler rowaçlanýar. Agzaçar mahaly berilýän sadakalar ynsanlary has-da ýakynlaşdyrýar, birek-birege bolan dost-doganlyk gatnaşyklaryny berkidýär.
