Düýn Ahal welaýatynyň Gökdepe etrabynyň Ahal geňeşliginiň çäginde lagym arassalaýjy desga açylyp ulanmaga berildi. Şu mynasybetli ýaýbaňlandyrylan dabara welaýat, etrap häkimlikleriniň, edara-kärhanalaryň jogapkär işgärleri, jemgyýetçilik guramalarynyň wekilleri, Mejlisiň deputatlary, dili senaly ýaşululardyr mährem eneler, şeýle-de ýerli ýaşaýjylar gatnaşdylar.
Dabarada çykyş edenler Berkarar döwletiň täze eýýamynyň Galkynyşy döwründe ýurdumyzda suw serişdelerinden netijeli peýdalanmak, olary tygşytlamaga ýardam berýän häzirki zaman tehnologiýalaryny hem-de innowasion ylmy-tehnologik işläp taýýarlamalary önümçilige ornaşdyrmak, sebitlerde lagym suwuny arassalaýjy desgalary gurdurmak we ilatyň ýaşaýyş-durmuş derejesini has-da gowulandyrmak bilen baglanyşykly tagallalaryň barha rowaçlanýandygyny belläp, toý meýdançasyna ýygnananlary täze desganyň gurulmagy mynasybetli gutladylar. Çykyşlarda ulus-ilimiziň eşretli durmuşyň hözirini görüp ýaşamagy ugrundaky tutumly işleri we täze desgany gurdurandygy üçin Arkadagly Gahryman Serdarymyzyň, şeýle-de Gahryman Arkadagymyzyň adyna alkyş aýdyldy.