Öňňin Türkmenistanyň Saglygy goraýyş we derman senagaty ministrliginiň guramagynda Arkadag şäheriniň köpugurly hassahanasynyň mejlisler zalynda ýokanç däl keselleriň öňüni almak we olaryň garşysyna göreşmek boýunça Aşgabat jarnamasynyň kabul edilmeginiň 10 ýyllygy mynasybetli ylmy-amaly maslahat geçirildi.
Bütindünýä Saglygy Goraýyş Guramasynyň ýurdumyzdaky wekilhanasy bilen bilelikde guralan maslahata saglygy goraýyş ulgamynyň ýolbaşçy düzümi, Aşgabat we Arkadag şäherleriniň, welaýatlaryň lukmançylyk edaralarynyň pulmonolog, newropatolog, endokrinolog, onkolog, kardiolog, terapewt lukmanlary, Myrat Garryýew adyndaky Türkmenistanyň Döwlet lukmançylyk uniwersitetiniň professor-mugallymlary gatnaşdylar.
