— Arkadag Serdarly bagtyýar ýaşlar ýylynyň Bilimler we talyp ýaşlar güni durmuşymyzda iň bir ýatdan çykmajak bagtly günleriň biri boldy. Şol gün garry mamam Saçly Dursunowanyň adyny göterýän lukmançylyk orta hünär okuw mekdebiniň açylmagy, meniň hem Türkmen döwlet bedenterbiýe we sport institutynyň 1-nji ýyl talyby bolmagym biziň maşgalamyzyň begenjini, buýsanjyny artdyrdy.
Saçly Dursunowanyň lukmançylyk ylmynyň ösmegi ugrunda eden işleri, uruş ýyllarynda görkezen gahrymançylygy dogrusynda ejem Selbi Rahymowa, mamam Anna Çerkezowa köp zatlary gürrüň berdiler. Garry mamamyň ýatlama suratlary, döwlet we harby sylaglary, ordendir medallary, lukmançylyk ulgamyny kämilleşdirmekde taýýarlan ylmy işleri Saçly Dursunowa adyndaky Arkadag şäher lukmançylyk orta hünär okuw mekdebinde döredilen muzeýde goýuldy. Nesip bolsa, bu lukmançylyk orta hünär okuw mekdebinde halkymyzyň saglygyny goramakda uly işleri durmuşa geçirjek ýokary derejeli saglygy goraýyş işgärleri taýýarlanyp ýetişdiriler.
