Şeýle at bilen 2-nji oktýabrda Arkadag şäherindäki Aba Annaýew adyndaky Halkara atçylyk akademiýasynda Türkmenistanyň Bilim, Daşary işler ministrlikleriniň we Magtymguly adyndaky Ýaşlar guramasynyň Merkezi geňeşiniň bilelikde guramagynda Halkara ýaşlar forumy geçirildi. BMG-niň Merkezi Aziýa üçin öňüni alyş diplomatiýasy boýunça sebit merkezi, ýaşlar guramalary we bilim edaralary bu halkara forumyň hyzmatdaşlary hökmünde çykyş etdiler.
Halkara foruma gatnaşyjylar, ilki bilen, Aba Annaýew adyndaky Halkara atçylyk akademiýasynyň eýwanynda görkezilen bezeg we amaly-haşam sungatynyň sergisi bilen tanyşdylar. 4 sessiýadan ybarat bolan forumda ýaşlaryň halkara giňişlikdäki tutýan orny hakda gürrüň edildi.
