Halkymyzyň arasynda sagdyn durmuş ýörelgesini berkitmek, wagyz-nesihat işlerini güýçlendirmek, nesillerimizi sagdyn ruhda terbiýelemek, adamzadyň saglygyna zyýan ýetirýän çilimkeşlige garşy göreşmek, ýaşlaryň beden we ruhy taýdan sagdyn bolmagyny gazanmak we Türkmenistany 2025-nji ýyla çenli temmäkiden azat ýurda öwürmek maksady bilen, ýurdumyzda temmäki bilen baglanyşykly keselleriň öňüni almak, ilatyň arasynda temmäki önümlerini ulanmagyň zyýanly täsiri boýunça wagyz-nesihat çäreleri yzygiderli geçirilýär. Ýurdumyz temmäkä garşy göreş işinde beýleki ýurtlara nusgalyk görelde bolýar we Bütindünýä Saglygy Goraýyş Guramasy bilen hyzmatdaşlygy işjeňleşdirýär. Raýatlarymyzyň saglyk ýagdaýyny has-da gowulandyrmak we abadançylygyny ýokarlandyrmak, adam ömrüniň dowamlylygyny artdyrmak, Türkmenistany 2025-nji ýyla çenli temmäkiden azat ýurda öwürmek üçin netijeli çäreleri özünde jemleýän Milli maksatnama hereket edýär.
Şeýle-de ýurdumyzda «Raýatlaryň saglygynyň temmäki tüssesiniň täsirinden we temmäki önümlerini ulanmagyň netijelerinden goralmagy hakynda» Türkmenistanyň Kanuny kabul edildi. Şeýle-de temmäki ulanmakdan ejir çekýän raýatlara degişli maslahatlary bermek maksady bilen, Aşgabat şäherinde we ähli welaýat merkezlerinde «Ynam» merkezleri döredildi we «Ynam» telefonlary birikdirildi.
