Ýurdumyzyň her bir raýatynyň bagtly we bagtyýar durmuşda ýaşamagy ugrunda beýik işleri alyp barýan türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gahryman Arkadagymyz 10-njy dekabrda Türkmenistanyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň mejlisini geçirdi. Gahryman Arkadagymyz mejlisi açyp, häzirki döwürde ýurdumyzda paýhasly pederlerimiziň dünýä nusgalyk işleriniň mynasyp dowam etdirilýändigini belledi. Milli senenamamyzda möhüm orun eýeleýän we halkymyzyň durmuşynda aýratyn ähmiýeti bolan şanly seneleriň hormatyna guralýan dabaralarda halkymyzyň bagtyýar durmuşy, ýurdumyzyň sazlaşykly ösüşi öz beýanyny tapýar. Türkmen halkynyň Milli Lideri hemmeleri 2024-nji ýylyň üstünlikli jemlenmegi we Garaşsyz döwletimiziň hemişelik Bitaraplygynyň 29 ýyllygy bilen gutlady. Hormatly Arkadagymyz Halk Maslahatynyň gün tertibindäki wezipeleri, döwletimiziň alyp barýan içeri we daşary syýasatyny halka ýetirmekde, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işini ilerletmekde, ýaşlary milli däp-dessurlarymyz esasynda terbiýelemekde Ýaşulular geňeşiniň agzalarynyň uly goldaw berýändiklerini belledi.
Soňra mejlise gatnaşyjylara söz berildi. Çykyş edenleriň nygtaýyşlary ýaly, Berkarar döwletiň täze eýýamynyň Galkynyşy döwründe Gahryman Arkadagymyzyň başlangyçlaryny üstünlikli durmuşa geçirýän hormatly Prezidentimiziň parasatly baştutanlygynda ýurdumyzda uly işler amala aşyrylýar. Bu işler halkymyzyň ýaşaýyş-durmuş derejesini mundan beýläk-de ýokarlandyrmaga gönükdirilendir. Şunuň bilen baglylykda, Gahryman Arkadagymyzyň «Hakyda göwheri» atly kitabynyň çapdan çykmagy, halkymyzyň göwün guşuny ganatlandyrdy we hemişelik Bitaraplygymyzyň şanly toýuna ajaýyp sowgat boldy. Şeýle hem ýurdumyzyň sebitlerinde şu ýylyň dowamynda gurlup ulanylmaga berlen ýaşaýyş-durmuş maksatly binalaryň halkymyzyň hal-ýagdaýyny gowulandyrmakdaky ähmiýeti dogrusynda hem giňişleýin gürrüň edildi. Mejlisiň dowamynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň agzalarynyň belleýişleri ýaly, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy ýüzlerçe çaganyň saglygyny dikeltmäge ägirt uly goşant goşýar. Munuň özi Gahryman Arkadagymyzyň sahawatynyň aýdyň nyşanydyr.
