Bu kerem-keramatly, gojaman daglaryň degresine goşa ýaz gelene döndi. Aňňat-aňňat baýyrlara ýaşyl begres geýdiren, daglaryň etegini gül-güläleklere beslän joşgunly ýaza muwapyk ajaýyp döwrümizden gül-gül açylan ýaşlyk baharynyň – Arkadag Serdarly bagtyýar ýaşlaryň göwün guşyny ganatlandyran ýakymly pursatlaryň täsiri şeýle pikirleri seriňde oýarýar.
«Pähim-paýhas ummany Magtymguly Pyragy» ýylynyň 10-njy maýynda Balkan welaýatynyň Magtymguly etrabynda Türkmenistanyň Magtymguly adyndaky Ýaşlar guramasynyň Merkezi Geňeşiniň, Ylymlar akademiýasynyň Magtymguly adyndaky Dil, edebiýat we milli golýazmalar institutynyň hem-de Balkan welaýat häkimliginiň bilelikde guramagynda «Pähim – paýhas ummany Magtymguly Pyragy» ýyly hem-de Magtymguly Pyragynyň doglan gününiň 300 ýyllygy mynasybetli ýurdumyzyň ýaşlarynyň arasynda geçirilen »Magtymguly – geçmişimiz, şu günümiz we geljegimizdir» atly ylmy-amaly maslahat hem täsirli pursatlara baý boldy.
