Berkarar döwletiň täze eýýamynyň Galkynyşy döwri özara gatnaşyklaryň medeniýetiniň we medeniýetleriň özara gatnaşygynyň köpasyrlyk tejribesini özünde jemleýän Beýik Ýüpek ýolunyň täze döwrüne badalga berdi. Beýik Ýüpek ýolunyň ýüregindäki Merkezi Aziýa ýurtlarynyň we Hytaý Halk Respublikasynyň ýaşlarynyň ýürekdeşligi yklymlary birleşdiriji güýje öwrülen bu ýoluň täze eýýamynda ýaşlaryň ornunyň uludygyny dünýä äşgär etdi. 16-njy noýabrda Mary welaýatynyň Mary şäherindäki welaýat kitaphanasynda Merkezi Aziýa ýurtlarynyň we Hytaý Halk Respublikasynyň ýaşlarynyň «Beýik Ýüpek ýolunyň täze eýýamy» atly forumynyň açylyş dabarasy geçirildi. Bu ýere ýygnanan ýaşlaryň ýüzündäki şatlyk, kalbyndaky buýsanç, dilindäki alkyşlar Beýik Ýüpek ýolunyň ýüreginiň ýylysy bilen utgaşdy.
Şol gün Mary welaýat kitaphanasynyň öňündäki giň meýdançada köpugurly sergi ýaýbaňlandyryldy, aýdym-sazlaryň owazy belent ýaňlandy. Sergide ýaşlaryň taýýarlan diwarlyklary, sungat eserleri, türkmen milli gymmatlyklary görkezildi. Hormatly Prezidentimiziň Gutlagy foruma gatnaşyjylarda uly ruhubelentlik döretdi. Merkezi Aziýa ýurtlarynyň we Hytaýyň ýaşlarynyň «Beýik Ýüpek ýolunyň täze eýýamy» atly forumy Türkmenistanyň, Gazagystan, Gyrgyz, Täjigistan, Özbegistan Respublikalarynyň we Hytaý Halk Respublikasynyň ylym, bilim, medeniýet, sungat, parlament ulgamlarynyň ýaş wekillerini, Merkezi Aziýa ýurtlarynyň hem-de Hytaýyň Durnukly ösüş maksatlarynyň ilçilerini özünde jemledi. Hormatly Prezidentimiziň belleýşi ýaly, bu forum ýaşlar syýasaty babatda halkara hyzmatdaşlygy ösdürmegiň anyk ýollaryny kesgitlemekde möhüm ähmiýete eýe boldy. Howanyň üýtgemegi, daşky gurşawyň durnuklylygy, bilimde, ylymda we innowasiýalarda, medeniýetde, sungatda ýaşlaryň arasyndaky hyzmatdaşlygy, parahatçylygy, dostlugy pugtalandyrmakda Bitarap Türkmenistanyň toplan baý tejribesi, Beýik Ýüpek ýoluny täzeden dikeltmekde ýaşlaryň orny ýaly wajyp meseleler ara alnyp maslahatlaşyldy. Şeýle forumlaryň, halkara çäreleriň guralmagy bilen, Merkezi Aziýa ýurtlarynyň, Hytaýyň arasynda bilim, ylym, medeniýet, ýaşlar syýasaty meseleleri boýunça mümkinçilikleriň birleşdirilmegi ählumumy parahatçylygy, bähbitleri göz öňünde tutup, halklaryň we döwletleriň arasynda hoşniýetli hyzmatdaşlygyň kemala gelmegine gönükdirilen täze mazmunly gatnaşyklary ýola goýmaga mümkinçilik döredýär.
