Her bir ynsan öz ömrüniň, durmuş ýolunyň ussasy. Olaryň ählisi şol geçen ýolunda jemgyýete peýdaly işler bilen meşgullanyp, ýagşy amallara ýaran bolmagyň ugrunda hereket edýärler.
Ömür diýlende, adatça, diňe ýagşy amallar göz öňüňe gelýär. Çünki taryhda ýaşap geçen akyldaryň ýaşan ýaşyny bitiren işleriniň sanyna görä kesgitleýşi ýaly, ömür ýolunda diňe gowy netijeler, gazanylan üstünlikler şamçyrag ýaly ýanyp, ilki göze ilýär. Şonuň üçinem heňňamlar aýlansa-da, şol ynsanyň ady diňe onuň ýagşy amallary bilen ýatlanýar. Magtymguly atamyzyň: «Ýagşy iş et, senden ýagşy at galar» diýşi ýaly, ähli ynsanlar özünden soňky döwür üçin ýagşy at goýmaga ymtylýar. Gahryman Arkadagymyz «Ömrümiň manysy» atly kitabynda: «Men ynsan ömrüniň manysy bitiren gowy işlerinde bolýar diýen düşünjä uýýaryn. Sebäbi her bir adam bitiren şeýle gowy işleri bilen beýgelýär, şolar bilen ýalkanýar» diýip belleýär.
