Futbol boýunça Türkmenistanyň Kubogy ýaryşynda ýarym finalçylar belli boldy. Bir oýundan ybarat bolan çärýek final duşuşyklarynda myhmançylykdaky toparlar ýeňiş bilen dolandylar. Her toparyň 2 gol geçiren oýnunda «Altyn asyr» myhmançylykda «Nebitçiden » penalti urgularynyň netijesinde üstün çykmagy başardy. Duşuşykda ýer eýeleriniň gollaryny Süleýman Derýaýew (26) bilen Azat Garajaýew (90+5 p), aragatnaşykçylaryň gollaryny Begmyrat Baýew (12) bilen Myrat Annaýew (68 p) geçirdi. Oýundan soňky 11 metrlik jerime urgularynda «Altyn asyr» 4–3 öňe saýlandy. «Energetik » bilen «Köpetdagyň » arasyndaky oýnuň esasy wagty 1–1 deňlikde gutaryp (Muhammet Işangulyýew 86 — Yhlas Saparmämmedow 71), penaltilerde «Köpetdag » 4–3 ýeňiş gazandy. Beýleki oýunlarda- da «Ahal» myhmançylykda «Aşgabat » toparyny 2–1, «Şagadam » «Merwi» 3–1 hasabynda ýeňlişe sezewar etdi. «Ahal» toparynyň 2 goluny- da 29- njy (p) we 50-nji minutlarda Arslanmyrat Amanow derwezä girizdi. Marydaky duşuşykda «Şagadam » Baýramgeldi Nurlyýewiň, Kerim Hojaberdiýewiň hem-de Resul Mahmudowyň gollary bilen 3–0 öňe saýlandy. 79-njy minutda Serdaraly Ataýewiň ýeke- täk goly «Merwe » ýeterlik bolmady. Ýarym finalda «Altyn asyr» «Ahaly », «Şagadam » hem «Köpetdagy » kabul eder. Bir oýundan ybarat boljak ýarym final duşuşyklary 7-nji dekabrda geçiriler.