Berkarar döwletimiziň bagtyýarlyk döwründe hormatly Prezidentimiziň ýolbaşçylygynda ýurdumyzda köpçülikleýin bedenterbiýäni we sporty ösdürmek, jemgyýetde, aýratynam ýaş nesilleriň arasynda sagdyn durmuş ýörelgelerini ornaşdyrmak, netijede, ýaş nesli beden taýdan berk, sagdyn, ruhubelent adamlar edip terbiýeläp ýetişdirmek babatda giň gerimli işler üstünlikli amala aşyrylýar. Ak mermerli paýtagtymyz Aşgabat şäherinde, ýurdumyzyň ähli welaýatlarynda dürli sport desgalary, toplumlary gurlup, ulanylmaga berildi. Arkadag Prezidentimiz: «Sport ynsany beden we ruhy taýdan taplaýan, dünýägaraýşyny kämilleşdirýän gymmatlykdyr. Bedenterbiýä we sporta biz jemgyýetimizi jebisleşdirýän, halkymyzy beýik ösüşlere ruhlandyrýan güýç hökmünde garaýarys. Şundan ugur alyp, köpçülikleýin bedenterbiýe-sagaldyş hereketini ösdürýäris» diýmek bilen, bu ugurda dünýä nusgalyk işleri amala aşyrdy, halkymyzyň sagdyn we ruhubelent durmuşda ýaşamagyna zerur şertleri üpjün etdi.
Bu günki gün raýatlarymyz, şol sanda ýaş nesiller sportuň dürli görnüşleri bilen yzygiderli meşgullanyp, öz durmuşlaryny oýlanyşykly, pähim-paýhasly garaýyşlardan ugur alyp, Gahryman Arkadagymyzyň nusgalyk göreldesini ýörelge edinip gurýarlar. Milli Liderimiziň alyp barýan syýasatynyň baş maksady bolsa, jemgyýetde sagdyn durmuş ýörelgelerini wagyz etmekden we sagdyn bedenli, belent ruhly nesilleri kemala getirmekden ybaratdyr. Şol esasdan, ýurdumyzda köpçülikleýin bedenterbiýe-sagaldyş hereketiniň we sportuň ösdürilmegi, bir tarapdan, halkymyzyň saglygynyň berkidilmegine ýardam etse, ikinji tarapdan, berk bedenli we belent ruhly, hyjuwly ýaşlaryň kemala gelmegine hem mümkinçilik döredýär.
