Moto GP boýunça möwsümiň 15-nji ýaryşy ABŞ-nyň Ostin şäherindäki «Americas» trassasynda geçirildi. 20 aýlawy 41 minut 41,435 sekuntda tamamlan «Repsol Honda» toparynyň ispaniýaly sürüjisi Mark Markes ýeňiş gazandy. Bu onuň şu möwsümdäki 2-nji, karýerasyndaky 58-nji ýeňşidir. Ýaryşda sanawyň lideri, fransiýaly pilot Fabio Kuatararo («Monster Energy Yamaha») 4,679 sekunt gijä galyp, 2-nji ýeri eýeledi. «Ducati Lenovo» toparynyň italýan piloty Françesko Banaia 3-nji orna mynasyp boldy.
Möwsümiň tamamlanmagyna 3 tapgyr galanda, Fabio Kuartararo 254 utuk bilen birinji orunda barýar. Françesko Banaia 202 utuk bilen 2-nji, ispaniýaly Žoan Mir 175 utuk toplap, 3-nji ýeri eýeleýär. Möwsümiň 16-njy ýaryşy 24-nji oktýabrda Italiýanyň Bolonýa şäherinde geçiriler.