Moto GP boýunça möwsümiň 13-nji bäsleşigi Ispaniýanyň Aragon zolagyndaky Alkanis şäherçesinde geçirildi. Ýaryşda 23 aýlawy 41 minut 44,422 sekuntda tamamlan «Ducati Lenovo» toparynyň italýan sürüjisi Françesko Banaia ýeňiş gazandy. Bu onuň karýerasyndaky ilkinji ýeňşidir. Bäsleşikde 2-nji ýere ýeňijiden 0,673 sekunt soň pellehanadan geçen ispaniýaly Mark Markes («Repsol Honda») mynasyp boldy. Başga bir ispaniýaly sürüji, «Suzuki Ecstar» toparynyň piloty Žoan Mir 3-nji orny eýeledi. Sanawyň lideri, fransiýaly sürüji Fabio Kuartararo («Monster Energy Yamaha») 8-nji ýer bilen kanagatlanmaly boldy. Geçirilen 13 ýaryşdan soň ol 214 utuk bilen sanawyň başyny çekýär. Banaia 161 utuk bilen 2-nji, 157 utukly Mir 3-nji orunda barýar. Möwsümiň indiki ýaryşy 19-njy sentýabrda San Marinoda geçiriler.