2021-nji ýyl. «Türkmenistan — parahatçylygyň we ynanyşmagyň Watany» ýyly. Eýýäm deň-ýaryndan gowragy yzda galan ýyly ýene-de telim-telim ýyllardan soň nähili ýakym bilen ýatlarys? Mukaddes Garaşsyzlygymyzyň şanly 30 ýyllyk toýunyň çägindäki dabaralaryň özi bir uly ýatlama ahyry! Ýöne baryp birmahal 2021-nji ýyl ýatlanylmaly bolsa, sport janköýerleri Olimpiýa oýunlarynda gazanan ilkinji medalymyzy hem uly ýakym bilen ýatlarlar. Özi hem bary-ýogy 21 ýaşly türgen gyzyň ady bilen baglanyşykly!
Elimizi ýüregimiziň üstüne goýup bir hakykaty aýtmak gerek: şu ýyl ýurdumyzda agyr atletikanyň, onda-da zenan agyr atletikaçylarymyzyň ýyly boldy. Diňe dünýäniň çempiony Ýulduz Jumabaýewa bilen Olimpiýa oýunlarynyň kümüş medalynyň eýesi Polina Gurýewanyň dakynan medallarynyň özi hem tutuş ýylyň sport wakalaryna aýratyn şan bagyşlap biler.