Türkmen döwlet bedenterbiýe we sport institutynyň talyby, Türkmenistanyň at gazanan sport ussady Polina Gurýewanyň Tokioda geçirilen tomusky Olimpiýa oýunlarynda görkezen şowly çykyşy türkmen sportunyň olimpiýa medallarynyň başyny başlady. Türgen gyzyň belleýşi ýaly, ýeňiş menziline ýetirýän köp sanly basgançaklar bar. Biz hem türkmen türgenleriniň täsirli çykyşlary, XXXII tomusky Olimpiýa oýunlary hem-de Tokio täsirleri, türgen gyzyň geljekki maksatlary baradaky söhbetdeşligimizi okyjylara ýetirmegi makul bildik.
— Polina, söhbede başlamazdan ozal, gazanan medalyňyz, dünýäniň nazary gönükýän iri sport ýaryşyndaky üstünlikli çykyşyňyz, şeýle-de mynasyp bolan Şa serpaýlaryňyz bilen tüýs ýürekden gutlaýarys!
