Hyýar, megerem, biziň saçaklarymyzda iň bir köp ulanylýan gök önümleriň biridir. Onuň işdä açyjy aýratynlygyny hasaba almanyňda-da, saglyk üçin peýdaly taraplary diýseň köpdür. Ony, hatda kosmetiki maksatlarda-da ulanýarlar. Sebäbi ol adamyň derisi üçin iň peýdaly önümleriň biridir. Hyýar galkan görnüşli mäz üçin peýdaly, tutuş bedeni juwanlandyrmakda, saça we dyrnaklara oňyn täsir edýär.
Alymlar hyýaryň iýmit hökmünde 6 müň ýyl mundan ozal, Hindistanda, Gimalaý daglarynyň eteklerinde ulanylyp başlanandygyny aýdýarlar. Onuň käbir halklaryň dilinde atlandyrylyşy «bişmedik», «çig» ýaly manylary berýär. Biz, hakykatdan-da, hyýary göklügine, çig görnüşde iýýäris. Ýöne hut bişmedik hyýarda witamin kän bolýar. Ötüşdigiçe hyýar ýokumlarynyň we peýdaly maddalarynyň 30 göterimine çenlisini ýitirýär.
