Berkarar döwletimiziň bagtyýarlyk döwründe halkymyzyň, şol sanda ösüp gelýän ýaş neslimiziň saglygyny goramak esasy ugurlaryň biridir. Şonuň üçin hem sagdyn durmuş ýörelgesine eýermek, sport we bedenterbiýe bilen meşgullanmak asylly däbe öwrüldi.
Häzirki bagtyýarlyk döwrümizde ýaşlarymyz hem sport bilen meşgullanyp, sagdyn ösýärler, kämilligi hemra edinýärler. Sport güýç-gaýratyň, gözelligiň, sagdynlygyň gözbaşydyr. Bedeni sagdyn saklamak üçin sportuň ähmiýeti uludyr. Özüňi sagdyn hem güýçli duýmak üçin köp hereket etmeli, ýöremeli, ylgamaly, suwda ýüzmeli, welosiped sürmeli. Sport bilen meşgullanmak myşsalaryň berkemegine, süňkleriň dogry ösmegine, bedeniňde madda çalşygynyň gowulaşmagyna, ruhuň göterilmegine kömek edýär. Ir bilen turup, fiziki maşklary ýerine ýetirmek bedeniň gan aýlanyşygyny, öýkeniň, ýüregiň işleýşini gowulandyrýar, fiziki we akyl taýdan bozulmalaryň öňüni almaga kömek edýär. Haýsy maşklary ýerine ýetireniňizde siz şondan lezzet alýan bolsaňyz, şolary ýerine ýetiriň. Günüň dowamynda, aýratyn hem ertirine wagtyňyzyň 30 minutyny sarp ediň.