Tebigatyň gözel künjekleriniň biri bolan Kaka etrabynyň Hywaabat jülgesindäki «Ýaşyl ýaýla» çagalar dynç alyş-sagaldyş merkezinde guralýan dürli mazmunly bäsleşikler ýaş nesliň dynç alyş günleriniň manyly geçmegine oňaýly täsirini ýetirýär. Ol ýerde Türkmenistanyň Magtymguly adyndaky Ýaşlar guramasynyň Ak bugdaý etrap Geňeşi tarapyndan ýörite meýilnama esasynda geçirilen surat bäsleşigi diýseň gyzykly boldy.
Bäsleşige merkezde dynç alýan oglan-gyzlar uly höwes bilen gatnaşdylar. Onda çagalara surat çekmek boýunça belli bir wagt berildi. Bagtyýar çagalar merkeziň çägindäki gözellikleri, dynç alşyň şatlykly pursatlaryny şekillere geçirdiler. Mundan başga-da, olar asfaltyň ýüzüne islegine görä, erkin temadan surat çekmekde ukyp-başarnygyny görkezdiler.
