Şu günler Türkmenistanyň Kärdeşler arkalaşyklarynyň welaýat, etrap birleşmeleri hem-de ilkinji guramalary tarapyndan çagalar dynç alyş-sagaldyş merkezlerinde gyzykly sport ýaryşlarydyr döredijilik bäsleşikleri, täsirli duşuşyklar guralýar. Olara ýaş nesliň wekilleri egsilmez şatlyk we joşgun bilen gatnaşýar.
GÖKDERE. Sergin howaly jülgede ýerleşýän «Beýik Serdaryň ruhubelent nesilleri» çagalar dynç alyş-sagaldyş merkezinde Ylym we bilim işgärleriniň kärdeşler arkalaşygynyň Ak bugdaý etrap Geňeşiniň guramagynda geçen sport ýaryşlary ruhubelentlige beslendi. «Biz — berkarar ýurduň sagdyn nesilleri» atly ýaryşa merkezde dynç alyp, saglygyny berkidýän çagalardan düzülen toparlaryň birnäçesi gatnaşdy.
