Welosiped ulagyň iň elýeterli, ekologiýa taýdan örän arassa, peýdaly we sagdynlygy üpjün edýän görnüşi bolup, ýurdumyzda welosiped sportuny ösdürmek babatda uly işler alnyp barylýar. Welosiped sportunyň ösdürilmegi daşky gurşawy goramaga hem-de halkymyzyň saglygyny üpjün etmäge gönükdirilen işleriň hatarynda mynasyp orun eýeleýär.
Welosiped sürmek adamyň bedenini taplap, umumy fiziki güýjüni we çydamlylygyny artdyrýar. Sportuň bu görnüşi aýratynam ýürek-damar keselleriniň döremek howpuny ep-esli azaldýar, dem alyş ulgamyny güýçlendirip, öýkeniň kadaly işlemegine ýardam berýär.
