Balkanabat şäherindäki köpugurly sport toplumynda sportuň gylyçlaşmak görnüşi boýunça ýaşlaryň we ýetginjekleriň arasynda ýurdumyzyň birinjiligi geçirildi. Türkmenistanyň Bedenterbiýe we sport baradaky döwlet komiteti tarapyndan guralan ýaryşa Diýarymyzyň çar künjeginden zehinli türgenler gatnaşyp, öz ukyp-başarnyklaryny görkezdiler.
17 ýaşdan uly bolmadyk türgenleriň arasynda gylyçlaşmagyň şpaga görnüşi boýunça guralan ýaryşda oglanlaryň arasynda Aşgabatdan Arslan Agaýew, gyzlaryň arasynda welaýatymyzdan Ýelizaweta Prytkowa ýurdumyzyň çempiony diýen ada eýe boldular. Bu ýaşdakylaryň arasynda rapira boýunça geçirilen ýaryşda balkanly türgenlere taý tapylman, oglanlaryň arasynda Şatlyk Orazow, gyzlaryň arasynda Çynar Goşungeldiýewa ähli garşydaşlaryndan üstün çykdylar. Gylyç görnüşinde bolsa Mary welaýatyndan Guwanç Gurdow we Ýelizaweta Wodopýanowa altyn medallaryň eýeleri bolmagy başardylar.
