Germaniýada hem-de Awstriýada geçirilýän «Four Hills» tramplinden bökmek ýaryşy tamamlandy. 72-nji gezek geçirilen ýaryşda ýaponiýaly Rýoýu Kobaýaşi ýeňiş gazanyp, ol 2019-njy we 2022-nji ýyllardan soň 3-nji çempionlygyny baýram etdi. 27 ýaşyndaky türgen geçirilen 4 ýaryşda-da 2-nji ýeri eýeläp, umumylykda 1145,2 utuk toplamagy başardy.
Germaniýanyň Oberstdorf hem-de Garmiş-Partenkirhen şäherçelerindäki ýaryşlarda degişlilikde Andreas Wellinger (Germaniýa) bilen Anže Lanişek (Sloweniýa) ýeňiji boldy. Awstriýanyň Insbruk hem-de Bişofshofen şäherlerindäki bäsleşiklerde-de awstriýaly türgenler Ýan Hörl bilen Ştefan Kraft ýeňiş gazandy.