«Türkmenistan Sport», № 4 (20), 2023
Göreş sporty asyrlaryň dowamynda halkymyzyň durmuşynda uly orun eýeläpdir. Türkmenlerde toý-dabaralar göreşsiz geçmändir. Diňe toýlarda orta çykýan pälwanlar däl, eýsem başa telpek geýen her bir kişi çagalykdan deň-duşlary bilen billeşip, toýlarda pälwanlaryň göreşine seredip, bu sungatyň esaslaryny ele alypdyr, göreşiň ençeme emellerini özleşdiripdir we zerur halatynda, meselem, söweşlerde olary ulanmagy başarydyr. Onsoň halkymyzyň ýaşaýyş durmuşyna şular ýaly eriş-argaç ornaşyp giden göreş sportunyň milli medeniýetimizde, aň-düşünjämizde, hususanam, söz baýlygymyzda dürli röwüşlerde öz beýanyny tapjagy şübhesizdir. Şoňa görä-de, türkmeniň gadymdan galan käbir aýtgylardyr nakyllarynyň asyl gelip çykyşy hem, belki, unudylanam bolsa, göreş sporty we oňa dahylly garaýyşlardyr däp-dessurlar bilen baglanyşyklydyr. Ynha, olaryň käbiri.