«Türkmenistan Sport», № 3 (19), 2023
Asyrlaryň dowamynda baý durmuş tejribesini we aň kämilligini toplan halkymyzyň aýtmadyk zady ýok. «Könesi bolmadygyň täzesi bolmaz» diýlişi ýaly, durmuşyň islendik ugruny alanyňda ilki onuň taryhy, geçmişi, geçen ýoly barada gyzyklanýarsyň. Biziň şu günki durmuşymyzda ulanýan ähli maddy we ruhy baýlyklarymyzyň sünnälenip nepisligi bilen häzirki wagta gelip ýetmeginde bolsa ýaşuly neslimiziň tutýan orny biçak uludyr. Olar garrysyny gazna deňän halkymyzyň arasynda janly ensiklopediýa hasaplanýar. Ýaşulularyň durmuşda tutýan orny, olaryň sarpasy barada pederlerimiz «Garry — öýüň sütüni», «Sen sylasaň garryny, Taňry sylar baryňy», «Ýigitlik — söweşde, garry — geňeşde» diýen ýaly birnäçe nakyllardyr atalar sözlerini döredipdirler.