Hormatly Prezidentimiziň taýsyz tagallasy netijesinde ýurdumyzyň maddy we medeni mirasyny gorap saklamakda, rejelemekde, olary umumadamzat gymmatlyklarynyň hatarynda bitewi ulgam hökmünde aýawly saklamakda döwlet derejesinde uly aladalar edilýär. Hormatly Prezidentimiz Serdar Berdimuhamedowyň 2022-nji ýylyň 8-nji aprelinde geçiren Ministrler Kabinetiniň mejlisinde gol çeken «Milli taryhy-medeni mirasyň obýektlerini aýap saklamagyň, goramagyň, öwrenmegiň hem-de olara syýahatçylary çekmegiň 2022 — 2028-nji ýyllar üçin Döwlet maksatnamasy» bu ugurda möhüm ädim boldy. Türkmenistanyň taryhy we medeni ýadygärliklerini ylmy taýdan öwrenmek we gorap saklamak bilen bir hatarda, olara hem-de ýurdumyzyň çäginde bar bolan gözel künjeklere syýahatçylary çekmek boýunça netijeli çäreler göz öňünde tutulýar. Syýahatçylaryň dünýä, milli we ýerli medeni gymmatlyklar, özboluşly däp-dessurlar, etnografik aýratynlyklar, binagärlik desgalary we medeni dessurlar bilen tanyşmaga bolan gyzyklanmalary milli syýahatçylygyň ösüşini şertlendirýär. Ýurdumyzda häzirki wagtda bäş sany syýahatçylyk çägi hereket edýär. Her syýahatçylyk sebiti özünüň taryhy-medeni we tebigy ýadygärlikleri bilen tapawutlanýar.
Taryhy ýadygärliklere diňe bir maddy ýadygärlikler däl, eýsem, ruhy gymmatlyklar, türkmen durmuşy bilen bagly gadymy gymmatlyklar hem degişli bolup, olar syýahatçylaryň halkymyzyň taryhyna bolan gyzyklanmasyny artdyrýar. Taryhda türkmen topragynda dürli uly döwletler döräpdir. Şol sebäpli, bu gadymy toprakda syýahatçylary gyzyklandyryp biljek köp taryhy gymmatlyklar bar. Şeýle gymmatlyklaryň hatarynda Uly Gyz galany, Soltan Sanjaryň, Gutlug Temiriň, Törebeg hanymyň mawzoleýlerini, Ak gala, Daýa Hatyn kerwensaraýlaryny, Dehistan minarasyny, Mäne baba hem-de Abul Fazlyň mawzoleýlerini, arheologik ýadygärlikler bolan Altyndepäni, Jeýtun medeniýetini, Dam-dam çeşmesini we ýene-de birnäçe gymmatlyklary agzamak bolar.
